當風佇秋天的草埔吹起〈I〉

當風佇秋天的草埔吹起〈I〉


當風佇秋天的草埔吹起
倒佇藍色天頂的雲
白色床巾頂的病人
像一隻年老的狗
佇失去勇氣的日光中
像一隻眯眯的貓─

一屑屑仔攏無振動，無屈伊的尻脊
無伸長伊的爪像恬恬睏去的根
像暗暝湠長的稀微星光
爆炸，lak落大地─

像一門新墓的火烌[hué-hu]
一屑屑仔人間的溫暖
我會記得彼是你最後的面容
寂寞的心是一絲一絲
吹過枯焦樹枝的風─

我猶會記得
當風佇秋天的草埔吹起
奔走過去的你的跤步聲
是一隻花鹿的蹄，頓[tǹg]佇土地的
重重節奏，擂拍的鼓─
有時，我會記得
這種節奏是我無意聽著
lak落靈魂樹葉的抱怨─

當風佇秋天的草埔吹起
你的身軀是溪埔燒紅的芒花─
一目nih，日頭沉落的天邊
像予漢人侵佔去面肉哭紅的查某囡仔
你屈佇大地的氣脈頂，吮著空喙
像著傷的烏熊胸前流出的新月─
是一支收割過向竹，流出悲傷的彎刀
是一尾澹漉漉的青花蛇，佇雨停的透早
趖[sô]佇茫霧的邊界─

是啊，彼是你毋捌跨[hua̍h]過的邊界
曠闊，有時彼茫霧像掣[tshuah]流的水
對時間的彼頭流過來的頭毛
是啊，彼時間是一條一條血河
一條一條佇你擲出鏢槍當時
雄雄捽[sut]過胸坎的雷電，是啊
彼毋捌越頭的時間像風中消失的種籽
彼消失的種籽沉落時間的海洋
彼海洋是失去邊界的茫霧─

佇我的靈魂出入
彼隱藏佇靈魂深底的艋舺
彼時扒[pe]到我靈魂的窗口
像花鹿仔子
一隻一隻，跳落秋天的草埔─
我的心綴[tuè]咧陷落，骨頭碎裂
熔化，重生─

一支瓶，一支壺……
一蕊插佇頭毛頂的圓仔花……