科威特 ─ Saadia Mufarreh詩選

【詩人紹介】


　　薩阿迪雅․穆法雷〈Saadia Mufarreh〉是一位詩人兼評論家，亦是科威特的Al-Qabas日報的藝術編輯。伊佇1987年時，對科威特大學畢業，主修阿拉伯語言佮教育。到目為止，伊也已經出版過四本詩集。



伊萊翠〈Electra〉

這个曖昧的人
實際的唱詩內底參有
神話的甜蜜，
而且充滿回憶
詩內期待的英雄形象已經過去
單剩……
一張寂寞的相片
我徛佇面前若像伊是一面鏡，
每當隱藏的問題加倍大時陣
著對因為須要切斷的
不完整的家庭故事內底
偷偷行向我。



冰箱

我拍開伊，
內底誠濟物。
幾罐保久乳
幾盒優格
幾袋仔凍肉
黃色的林果
藥仔佮麵包
佮……佮……等等。
佇我靈魂的冰箱內底！
物件散掖掖
閣過期
而且無人拍開過。



距離

佇房間佮大廳中間
是一條破磁仔磚的走廊。
我阿母怨講這呢細條。
干單我咧疼的身軀知影
伊實在真長。



祇是佇分叉路頂

我設法。
我摸因為須要藏起來的頭毛。
我偷偷共正手伸入囊袋仔，
像一隻散步的天鵝，
佇新鮮的空氣中幌袋仔。
我無意識唱家己的曲調。
毋閣分叉路頂攏擠誠濟人
而且天鵝毋知狗蟻的話。



倒落來的鏡

伊定定畫圖的花園
無樹木，無牛乳佮蜂蜜的河流過
園內伊畫圖的所在
單會使用昲藍色
若像是倒佇尻脊頂的鏡
炯炯看一片予結少可早熟水果的樹影
閘咧的天。



致─法德娃․圖肯(Fadwa Tuqan)

伊是對的
有一寡物件傳落來。
共智慧的嘉年華當做一个典禮
坐佇婦女佮人人著驚的問題
寶座頂面。
特色是佇殘雲後壁
佮樹林前
畫出一粒完滿的月。



一塊破玻璃

伊攪著顏料
當伊注意著兩蕊目睭值得作畫的時陣，
或者是一領花衫的布邊
粉鳥的喙
一塊破玻璃。

伊著急佇面前白霧的頂頭
來回抹兩下，疑問
當天看起來較闊的時陣
而且互相明顯的特色
愈離愈遠。