我毋是中華民族

　
　
　　假使，我若因為使用漢語的關係，著講家己是中華民族的一份子，按呢，我的查某祖若知，一定誠悲傷。

　　其實，毋免講到我的查某祖，假使我的後生、查某子，若對我講亻因是中華民族的一份子，按呢我一定會真自責，自責家己對不起序大人，對不起這塊土地，對不起查某祖。

　　我毋是中華民族的一份子，這毋免驚人知。我兜無祖譜，關係我的漢人祖先佗位來，我知影的，單是台南馬沙溝這个所在。我臆我的漢人祖先是施琅的兵仔，也馬沙溝是施琅來台灣落船的所在。馬沙溝，MA-SAKAU是平埔族的話「漁港」的意思，抑是咧講施琅的馬匹佇沙溝內翻沙拍滾，這對我來講無任何的意義。

　　我毋是中華民族的一份子，這毋是啥見笑代，我的祖先有可能是一个學會曉講漢語的馬沙溝平埔查甫人，伊早當時因為自悲，替家己號一个漢人的姓，佇墓牌頂編家己是「穎川」陳氏的後代。

　　我毋是中華民族的一份子，這無必要爭論，準講我的祖先真是施琅的兵仔，彼已經是三百幾年前的代誌。三百幾年前我的漢人祖先雙跤夾一粒囊葩到台灣，我的查某祖死了後無墓牌，無名無姓。我的查某祖伊無須要名佮姓，因為伊的後代陳秋白佇這塊土地繼續湠伊的靈魂佮精神。