大地的法則

掌門詩學季刊第58期編輯筆記


大地的法則


　　2010年，離1947年2月27日點著的228歷史事件到-tann，已經進入63年。一个見證過不幸歷史現場的少年人，經過63冬後，這-má也已經是生命強欲進入終點的八十歲跤-tau的老人。m̄-過，每一年到這个歷史事件發生的時節，流亡台灣65年的政權，in猶是無願意解開暗藏的檔案，這種m̄敢面對歷史的心態，hōo人不得不疊懸檔案已經早就毀掉的疑慮。

　　今年2月24號，tī高雄228屠殺第一現場的高雄市歷史博物館，有一本以台語寫作的228文學展選集〈火煉的水晶〉tī hia舉辦新冊發表會，會中的詩人、作家，讀in記錄不幸歷史心情的詩，講in對屠殺事件得著的真相。我讀一首描寫過去參加228紀念活動時陣，聽著真濟年過去-ah，受難者家屬猶原不時啼哭的心的詩。

　　歷史的真相無法度恢復會有啥物後果呢？敢講歷史真相無法度清楚交代，歷史的記憶就會像人的記憶一工、一工退化嗎？「一个囡仔tī讀著古早Frederick Barbaross皇帝毀滅義大利Milano市的事件，流著悲痛的目屎。大漢了後，伊無法度確定這件歷史事件的真實性，m̄-過伊對囡仔冊內底形成伊的結論的hit幾頁記憶清楚。伊心內，邪惡kah拍倒咱心內的盼望的決定性的力量對等，當伊發現這是大地的法則的時陣，伊討厭這个大地的法則。」，這是波蘭詩人詩人Milosz tī《路─邊狗》這本冊內底一篇〈The Law Of The Earth─大地的法則〉的文章。大地的法則，啥物是大地的法則？無真實記錄的歷史形成錯誤的大地的法則，是Milosz tī這篇文章內底的隱喻，這種無真實的大地的法則對後一代產生影響，咱透過Milosz得著啟示。相對，台灣1947年的228事件，咱kāng-款無希望錯誤的歷史記錄hōo下一代陷入矛盾的歷史kah心理陰影內底。